Imanol Idiakez admitiu este mediodía na sala de prensa de Abegondo que non está "contento coa primeira media hora do outro día en Granada. Non me gustou o que fixo o equipo, pero si que estou contento cos seguintes 50 minutos. Ata que aparece o gol deles anulado o equipo estaba bastante máis preto de gañar que de perder. E falamos dun rival de máximo nivel".
Pensa que "estamos nese proceso de ir coñecéndonos. Teño que ir vendo á xente competir, porque adestrar é unha cousa e competir é outra; e ver as posibilidades que nos dan. Creo que temos un bo cadro que nos vai a permitir ir resolvendo todas as situacións que a temporada nos expoña, pero non pode ser de golpe. As cousas pasan cando pasan e hai que ter un pouquiño de paciencia".
Cre que o partido deste venres 13 de setembro ás 20:30 (LaLiga TV Hypermotion e #Vamos) no Nuevo Arcángel ante o Córdoba CF vai estar "seguramente marcado polo ambiente. Eles apertan moito, a súa xente aperta moito. Veñen de facer un moi bo partido co Málaga, non vouche a dicir que someteron, pero practicamente. Xoga moi cara a adiante, moi ofensivo, con xente que busca ir cara a adiante. É un equipo que aperta alto, moi parecido a nós. Espérome un partido de ti a ti, con dous equipos que imos tentar buscar ao rival. Eles co empuxe da súa xente, que a verdade é que empuxa moito. Prevexo un partido de dificultade pero sobre todo de 2 equipos que se van a ir buscar seguramente".
Preguntado polas novas incorporacións, como Charlie Patiño, o adestrador deportivista pide paciencia: "Este ano cando acabou o mercado, xa coa liga empezada, completamos o cadro con outras posibilidades. O que non pode un adestrador é meter a todo o mundo de golpe. Eu sei que queremos ver á xente nova, sei que hoxe en día ademais na sociedade na que vivimos todo corre présa e cantas máis caras novas vexamos, mellor. Estamos no mundo da dopamina e o que vemos onte cansámonos xa hoxe. Pero temos que darlle equilibrio ao equipo e non podemos volvernos tolos. Hai que esperar a que a xente se adapte, hai que esperar a que pasen cousas e sobre todo o equipo ten que ter un comportamento regular. Ti non podes meter 6 xogadores novos cada día porque ao final ao equipo o que lle fas é unha faena".